soko li seme

tenpo te1/7/2025to . kulupu te sona to

mi pali e lipu ni tawa lipu tenpo nanpa supa

tenpo pini mute la jan li toki e ni3
soko en kasi li sama
ni li lon ala taso jan mute li awen toki e ni
sona soko li lili lon tenpo ni a
tan ni la mi wile toki e ni3 tawa sina
soko li seme

lukin la soko li kili lili
kili mute li linja tan anpa li supa sike lon sewi
taso kili li soko ale ala a
soko li suli a lon insa ma
kili li lon selo taso

open la soko li ijo lili
ona li pana e linja walo tawa ale pi insa ma
linja li pana e moku tawa ijo li ken mama e soko sin
taso mute la soko li pana e kili tawa selo ma
kili li suli la ona li pana e kon ko
kon ni li jo e sike mute lili lili a li mama e soko sin

kili li ken sijelo ante mute
ona li ken supa lon linja li ken sike li ken supa lon sinpin li ken ko…
sama la kili li ken kule ale
soko mute la sina moku e ona la sina moli
soko li ni tan ni3
ona li wile awen
ante la soko mute li pona a tawa sijelo a
sina wile lon sijelo wawa la o pana e soko pona tawa moku ale
soko seli li suwi tawa uta

sama kasi ala la suno li ike tawa soko
ona li wile e telo e pimeja
ni la soko li moku e seme
soko mute li moku e ijo moli
soweli anu kasi li moli la soko li tawa sijelo ona li moku e ona li weka e ona
kasi ale li loje li moli li tawa anpa ma la soko li moku e ona ale a
soko li lon ala la ijo moli li weka ala
soko li ken moku ante kin
soko nasa li utala e pipi li moku tan ona

soko ante en ijo ante pi soko ala li wan li pana e pona tawa ona ante tan moku
sina lukin e kiwen la ijo supa lili jelo li ken lon
ijo ni li soko li kasi a
kasi li pana e moku tawa soko la soko li awen e kasi
pini la kasi li toki tawa kasi ante kepeken linja walo soko

ma mi la soko li suli a tawa kulupu
ma pi jan ala la kili soko li mute
jan li alasa e ona li seli e ona li moku lon kulupu
ma lete la kili li mute ala
taso sina ken ala lukin e soko la soko li awen lon
soko li lon ala la ijo ala ante li ken lon
soko li suli

↩